Saturday, August 27, 2011

അഴിമതി - സമരം - കൈക്കൂലി

ഒന്നാമന്‍ : അണ്ണാ അറിഞ്ഞോ
രണ്ടാമന്‍ :എന്തോന്നാടേ?
ഒ : ഞങ്ങളുടെ നിരാഹാരം വിജയിച്ചു
ര : നിങ്ങളെന്തിനാടെ നിരാഹാരം കിടന്നത് ?
ഒ : അഴിമതിയെ ഇല്ലാതാക്കാന്‍
ര : എന്നിട്ട് ഇല്ലാതായോ?
ഒ : ഇല്ലാതാവുന്നതിന്റെ ലക്ഷണം കാണുന്നുണ്ട്.
ര : എടാ നിരാഹാരം കിടക്കുന്നവര്‍ വെള്ളം ഒക്കെ കുടിക്കുമോ
ഒ : അണ്ണാ നിരാഹാരം എന്ന് പറഞ്ഞാല്‍ നീര് ആഹാരം ആക്കി കിടക്കുക എന്നാണന്നറിയില്ലേ?
ര: ഉവ്വോ, അങ്ങനേയും അര്‍ത്ഥമുണ്ടോ
ഒ : ഉണ്ടണ്ണാ
ര : അല്ല. ആരാ നിരാഹാരം കിടന്നത്.
ഒ : ഡല്‍ഹിയില്‍ ഒരു വണ്‍‌ മിസ്റ്റര്‍.. ആരോ ആണോ?
ര : നിനക്ക് പേരറിയില്ലേ..
ഒ : പേരിലൊക്കൊ എന്ത് കാര്യമണ്ണാ. നമ്മുടെ സമരം വിജയിച്ചല്ലോ. അതുമതി
ര : അല്ല നീ എന്താ ഈ സമരത്തിനു ചെയ്തത്.
ഒ : അതണ്ണാ ഞങ്ങള്‍ എല്ലാ ദിവസവും വൈകിട്ട് ഓഫീസില്‍ മെഴുകുതിരി കത്തിച്ചു നിന്നു. പിന്നെ ഫേസ് ബുക്കിലും ഓര്‍ക്കൂട്ടികും ബസിലും ബ്ലോഗിലുമൊക്കെ ഞങ്ങള്‍ മെഴുകുതിരി കത്തിച്ചു നില്‍ക്കുന്ന ഫോട്ടൊ ഇട്ടു. എന്നിട്ട് ഞങ്ങള്‍ ഒരു പ്രകടനം നടത്തി. പിന്നെ അഴിമതി രഹിത ഇന്ത്യയെക്കുറിച്ച് ഒരു സെമിനാറും നടത്തി.
ര : സെമിനാറും ഉണ്ടായിരുന്നോ?
ഒ : പിന്നല്ലാതെ . നമ്മുടെ മറ്റേ ഹാളീല്‍ വെച്ചായിരുന്നു സെമിനാറ്.
ര : ആ ഹാളിനു ഒരു ദിവസം 10000 രൂപയങ്ങാണ്ടല്ലിയോ വാടക.
ഒ : എസി ഉണ്ടങ്കിലേ ആള്‍ക്കാര്‍ സെമിനാറിന് വരത്തുള്ളൂന്ന് പറഞ്ഞാല്‍ പിന്നെ അതവിടെവച്ചല്ലേ നടത്താന്‍ പറ്റൂ.
ര : ഓ ശരി.. ശരി.... ഇപ്പോള്‍ അഴിമതിയൊക്കെ മാറിയോ?
ഒ : പിന്നില്ലിയോ
ര : അല്ല നീ ഇതെങ്ങോട്ടാ പോകുന്നത്?
ഒ : ഞാനൊന്ന് വരുമാന സര്‍ട്ടിഫിക്കറ്റ് വാങ്ങാന്‍ പോകുവാ.
ര : നിനക്കെന്തിനാടാ വരുമാന സര്‍ട്ടിഫിക്കറ്റ്.
ഒ : ഒരു രൂപയ്ക്കുള്ള അരി വാങ്ങാനാ.
ര : നിനക്കതില്‍ കൂടുതല്‍ വരുമാനമുണ്ടല്ലോടാ.
ഒ : പത്തോ ഇരുന്നൂറോ കൊടുത്താല്‍ നമുക്ക് വരുമാന സര്‍ട്ടിഫിക്കറ്റ് കിട്ടും,
ര : അപ്പോ കൈക്കൂലി കൊടുത്ത് സര്‍ട്ടിഫിക്കറ്റ് വാങ്ങാനാണല്ലേ?
ഒ : പിന്നല്ലാതെ.
ര : അപ്പോ പിന്നെ നീ അഴിമതി ഇല്ലാതാക്കാന്‍ സമരം നടത്തിയതോ.
ഒ : ആ സമരവും ഈ സര്‍ട്ടിഫിക്കറ്റും തമ്മിലെന്താ ബന്ധം?
ര : എടാ കൈക്കൂലി കൊടുക്കുന്നതും വാങ്ങുന്നതും ശിക്ഷാര്‍ഹം എന്ന് അവിടെ എഴുതി വച്ചിട്ടുണ്ടല്ലോ? വഴിവിട്ട കാര്യങ്ങള്‍ ചെയ്യുന്നതിന് ആ കാര്യം ചെയ്യുന്ന ആളിന് അല്ലങ്കില്‍ മറ്റേ ആളിന് അനര്‍ഹമായി കിട്ടുന്ന പണം/മൂല്യം ആണല്ലോ നീ ഒക്കെ പറയുന്ന അഴിമതി. നീ ഈ കൈക്കൂലി കൊടുക്കുന്നത് അഴിമതി ചെയ്യാന്‍ പ്രേരിപ്പിക്കുകയല്ലേ
ഒ : അങ്ങനെയൊക്കെ പറഞ്ഞാല്‍....
ര : എടാ ഈ അഴിമതി എന്ന് പറഞ്ഞാല്‍ മാനത്തൂന്ന് പൊട്ടി വീഴുന്നതൊന്നും അല്ല, നമ്മളുതന്നെ ഉണ്ടാക്കി എടുക്കുന്ന ഒരു സംഗതിയാ അത്. അത് ഇല്ലാതാക്കണമെങ്കില്‍ അഴിമതിക്കെതിരെയുള്ള പ്രവര്‍ത്തനം നമ്മളില്‍ നിന്നു തന്നെ തുടങ്ങണം...
ഒ : ഏതായാലും ഞാന്‍ സര്‍ട്ടിഫിക്കറ്റ് വാങ്ങാന്‍ പോകുവാ.
ര : നാളെ അഴിമതിക്കെതിരെ ഒരു ഹര്‍ത്താലൂടെ നടത്തിയാല്‍ പൂര്‍ണ്ണമായി

Friday, August 26, 2011

പ്രതിഷേധ സമരം

നാടൊട്ടുക്ക് പാചക വാതക വില വര്‍ദ്ധനയില്‍ പ്രതിഷേധിച്ച് സമരം....
നമ്മളും സമരം ചെയ്യണമെന്ന് ഒരു വനിതാ സംഘടനയുടെ യോഗത്തില്‍ ചില വനിതാ അംഗങ്ങള്‍ വാദിച്ചു.
വഴി വക്കില്‍ കഞ്ഞി വെച്ച് സമരം നടത്താമെന്ന് ചിലര്‍.
ഗ്യാസില്ലാതെ എങ്ങനെ കഞ്ഞി വെക്കുമെന്ന് ചിലര്‍ .
കൊതുമ്പും ചൂട്ടും വെച്ച് തീ കത്തിക്കാമെന്ന് ചിലര്‍ .
കൊതുമ്പും ചൂട്ടും എന്താണന്നായി ചിലര്‍ ...
ചൂടേറിയ വാദ പ്രതിവാദങ്ങള്‍ .....
അവസാനം തീരുമാനം ആയി.....
ഗ്യാസുകുറ്റി(കാലിക്കുറ്റി) തലയില്‍ വെച്ച് പ്രതിഷേധ പ്രകടനം നടത്തിയതിനു ശേഷം വഴി വക്കില്‍ നിന്ന് കഞ്ഞി വെയ്ക്കുക...
അങ്ങനെ സമരത്തിന്റെ സമയമായി...
സമരക്കാരു നേരത്തെ തന്നെ പത്രക്കാരേയും ചാനലുകാരേയും വിവരം അറിയിച്ചിരുന്നതുകൊണ്ട് അവരു ക്യാമറുയുമായെല്ലാം എത്തി റെഡിയായി നിന്നു....
ഗ്യാസുകുറ്റി കൊണ്ടുവരാന്‍ ഏല്‍പ്പിച്ചവന്‍ ഗ്യാസു കുറ്റിയുമായി എത്തി.
പ്രസിഡണ്ടും സെക്രട്ടറിയും എല്ലാം ഗ്യാസു കുറ്റി പൊക്കി തലയില്‍ വെക്കാന്‍ തുടങ്ങിയപ്പോഴാണ് ചതി മനസിലായത്.
കാലിക്കുറ്റിക്ക് പകരം കൊണ്ടു വന്നത് ഗ്യാസ് നിറയെയുള്ള കുറ്റിയാണ്.
ഗ്യാസുകാരനോട് ഗ്യാസുകുറ്റി വേണമെന്നേ പറഞ്ഞുള്ളായിരുന്നു. അവന്‍ നിറച്ച കുറ്റിയുമായി വരുമെന്ന് സ്വപ്നത്തില്‍ പോലും ആരും കരുതിയില്ല.
ചാനലുകാരെയെല്ലാം വിളിച്ചു വരുത്തിയിട്ട് സമരം നടത്തിയില്ലങ്കില്‍ സംഘടനയ്ക്ക് നാണക്കേടാവും...
അവസാനം ചുമട് എടുക്കുന്ന സ്ത്രികളെ കൂലിക്ക് വിളിച്ചു കൊണ്ടു വന്നു ഗ്യാസുകുറ്റി അവരുടെ തലയില്‍ വെച്ച് പ്രകടനം നടത്തി.
പിറ്റേന്ന് പത്രത്തില്‍ പടം വന്നപ്പോള്‍ സംഘടനയിലെ ഒറ്റ ഒരെണ്ണത്തിന്റെ പടം ഇല്ല... ഗ്യാസുകുറ്റിതലയില്‍ വെച്ച് പ്രകടനത്തിന്റെ മുന്നില്‍ നിന്നവരുടെ പടം മാത്രം !!!!

പ്രകടനം

ഒന്നാമന്‍ : ദോ കണ്ടോടാ, ഡിസല്‍-പാചകവാതക വിലവര്‍ദ്ധനവിനെതിരേ ആള്‍ക്കാര്‍ പ്രകടനം നടത്തുന്നത്.
രണ്ടാമന്‍ : പത്തിരുന്നൂറ് ആള്‍ക്കാര്‍ ഉണ്ടല്ലോ.
ഒന്നാമന്‍ : നമ്മുടെ നേതാവും സിനിമാ നടനും ഒക്കെയുണ്ടല്ലോ ആ പ്രകടനത്തില്‍ .
രണ്ടാമന്‍ : വില വര്‍ദ്ധന ജനങ്ങളെ ബന്ധനത്തില്‍ ആക്കിയിരിക്കുന്നു എന്ന് കാണിക്കാനായിരിക്കും അവര്‍ പ്രതീകാത്മകമായി വിലങ്ങ് ഇട്ട് പ്രകടനം നടത്തുന്നത്.
ഒന്നാമന്‍ : വില വര്‍ദ്ധന ജനങ്ങളെ തളര്‍ത്തി എന്ന് സൂചിപ്പിക്കാനായിരിക്കും അവര്‍ മുദ്രാവാക്യം വിളിക്കാതെ പോകുന്നത്.
രണ്ടാമന്‍ : ഭയങ്കര പ്രകടനവും സമരവും ആണന്നാ തോന്നുന്നത്. കണ്ടോ മുന്നിലും പുറകിലും പോലീസ് ജീപ്പും,വാനും, ചാനലുകാരും
മൂന്നാമന്‍ : എടേ അത് വിലവര്‍ദ്ധനയ്ക്കെതിരെയുള്ള പ്രകടനം ഒന്നും അല്ല. പ്രായപൂര്‍ത്തിയാകാത്ത ഒരു പെണ്‍‌കൊച്ചിനെ പീഡിപ്പിച്ചവരെ കോടതയില്‍ ഹാജരാക്കാന്‍ കൊണ്ടു പോകുന്നതാ